Spáð og hrakspáð

Nú hef ég gefið upp alla von um að framsóknarflokkurinn verði með í næstu ríkisstjórn. Hér með ætla ég að veðja á Sjálfstæðisflokkinn og VG.
Og ekki láta ykkur dreyma um að við komumst áfram í Júróvisjón.

Erfiður dagur að kveldi kominn

Þetta var nú meiri dagurinn. Ætla samt ekki að fara út í nein smáatriði, því þá fer ég að hljóma eins og konan sem var búin að fá alla sjúkdóma nema pungsig. En það verður ágætt að fara í vinnuna og hitta Siglfirðingana á morgun.

Guðspjallstexti morgundagsins er svo yndislegur, þú hefur gott af því að lesa hann:

Þetta er mitt boðorð, að þér elskið hver annan, eins og ég hef elskað yður. Enginn á meiri kærleik en þann að leggja líf sitt í sölurnar fyrir vini sína. Þér eruð vinir mínir, ef þér gjörið það, sem ég býð yður. Ég kalla yður ekki framar þjóna, því þjónninn veit ekki, hvað herra hans gjörir. En ég kalla yður vini, því ég hef kunngjört yður allt, sem ég heyrði af föður mínum. Þér hafið ekki útvalið mig, heldur hef ég útvalið yður. Ég hef ákvarðað yður til að fara og bera ávöxt, ávöxt, sem varir, svo að faðirinn veiti yður sérhvað það sem þér biðjið hann um í mínu nafni. Þetta býð ég yður, að þér elskið hver annan. Jh. 15.12-17

Gullfoss og Geysir

Þessa daga þakka ég Guði fyrir þennan Wirlpool sem framleiddi þvottavélina mína. Hér hefur geysað ælupesti og "niðurpest" eins og Eymundur segir. Það var á föstudagskvöldið var sem heimasætan tók sig til og ældi um öll gólf. Hún jafnaði sig ekki fyrr en á mánudegi. Í fyrradag kom heimilisfaðirnn heim, grænn í framan og tók að gubba og spúa eins Geysir á góðum degi. Nóttin í nótt hefur ekki verið svensöm því einkasonurinn veiktist á þriðja tímanum. Nú situr hann í baði og segist vera að reyna að losna við þennan "æling". Og Wirlpool malar eins og kötttur í þvottahúsinu.

Spennandi tímar

Það er frábært að vera Skagfirðingur þegar sæluvikan gengur í garð. Ætla að ræsa út allar barnfóstur fyrr og síðar og reyna að komast á sem flest sem er í boði.
Lærði heilan helling fyrir og á flugslysaæfingunni og kynntist skemmtilegum konum sem eru með mér í áfallateymi. Ég get varla hugsað mér neitt kristilegra en starfa í áfallateymi og sinna fólki sem er í aðstæðum sem enginn vill lenda í. Svona getur maður verið skrítin.
Prédikaði í Sauðárkrókskirkju í dag í 25°hita og bjóst ekki við að neinn kæmi, en viti menn fullt af fólki. Svo var rölt á barinn og sest á héraðsfund. Hef ekki grænan grun um hvað er langt síðan að ég kom síðast inn á Mælifell en það gætu verið allt að tíu ár, hugsið ykkur. Það er bara svona að vera kona, eins og hún Marta segir stundum.
Heimasætan átti slæma helgi; ælupesti í fyrrakvöld og nótt, einhver óskilgreind veiki í dag og svo datt hún ofan af eldhússtól til að toppa sig, nýbúin að borða og gubbaði út í öll horn í beinu framhaldi. Hún er voðalega sóttköld eins og sumir ættingar hennar og heimilisfaðirinn var orðinn andlega úrvinda þegar héraðsfundinum loksins lauk.
Ef að heilsa heimasætunnar leyfir langar mig fram á Kjálka að skoða litlu lömbin á morgun.

Hjartað slær enn

Nú er ég búin að vera í húsmæðraorlofi á Húsavík undanfarna daga. Mikið var gaman að hitta gamla félaga og kynnast nýju fólki. Veðrið var yndislegt og Þingeyjasýslan skartaði sínu fegursta.

Framundan er fjörug helgi, flugslysaæfing á morgun, þar sem verður látið reyna á hvort við séum í stakk búin að höndla stórslys. Svo er héraðsfundur og sæluvikan á sunnudag. Eintóm sæla..

Gleðilegt sumar..

... elskurnar og takk fyrir veturinn.

Stjórnmálaleiði og valið

Með hverjum kosningum sem líða dvínar áhugi minn á póltík. Mér finnst það dálítið merkilegt en fyrir svona áratug eða svo, var ég hreinlega kraumandi af pólitískum áhuga. Núna finnst mér þetta allt vera eins og nenni varla að fylgjast með kosningaþáttum og umræðum. Hvers vegna í dauðanum eru svona hrikalega margir stjórnmálaflokkar og hreyfingar í landi með 300 þúsund íbúa?

Allra meina bót

Þessu get ég trúað. Þessu get ég vel trúað..

Súkkulaði hefur meiri áhrif á heilann en ástríðufullur koss

Heim á ný

Alltaf gaman að koma til Bangsapabba sagði Lilli klifurmús. Alltaf gaman að koma á suðvestur hornið en þó enn skemmtilegra að koma heim aftur.
Heimsóttum stoðtækjafræðing, taugalækni og röngendeild sem skaut nokkrum myndum af Eymundi Ás. Líklegt að við þurfum að koma aftur þegar verður búið að skoða myndirnar.
Heimsóttum allar heimsins föðursystur, föðursystir barnanna minna og báðar föðursystur mínar og fengum Ingu Heiðu og Gunnu Jóns í heimsókn til okkar. Sá framsóknarmanninn og konu hans í mýflugumynd. Óvæntasta ánægjan var að hitta gamlan skólafélaga og frænda, Vigfús Bjarna prest á Barnaspítalanum og Laxmýrung. Var næstum því búin að gleyma honum, þó það sé eiginlega ekki hægt. Annan Aðaldæling fundum við líka í Eymundsson sem pakkaði inn fermingargjöfum í akkorði.
Lögðum okkar að mörkum til að halda hagvextinum uppi með því að styrkja ýmsa kaupmenn á höfuðborgarsvæðinu. Hef oft heyrt mæður tala um að þær kaupi ekki neitt á sig, endi alltaf með að kaupa föt á börnin. Ég var einbeitt og meðvituð í Kringlunni og tók stóran sveig framhjá barnafataverslunum. Kom heim með nýja kápu og nýja skó.
Hestamaðurinn reið ekki feitum hesti frá þessum túr. Hrossið var með almenn andmæli og mótbárur við því sem það átti að gera. Mér datt í hug hvort hesturinn væri komin með keppnis-óþol og finndist kannski bara keppnir óþolandi? Margt býr í hesthausnum.

Sjaldséður gestur

Yfir mér er yfirþyrmandi feginleiki og þakklæti fyrir lífið í allri sinni dýrð. Í morgun gerðist nokkuð sem hefur ekki gerst í sex ár. Ég fékk mígrenikast af verstu sorg. Þvílíkar og slíkar kvalir! Var alveg búin að steingleyma því hvað mígreni getur framkallað mikinn sársauka. Nú er allt á bak og burt og tíu brjálaðir hestar gætu ekki komið mér úr jafnvægi.