Gleðilegt ár, nær og fjær

og bestu þakkir fyrir gömlu.
Held að þetta verði afbragðs ár.

Af messugjörðum

Jæja, gott fólk (nú haldið þið eflaust að ég sé full, nei ekki svo gott), glaðvakandi nýkomin úr jólaboði og verð eflaust andvaka eftir maraþon kaffidrykkju.
Ég átti merkilegt samtal við kunninga minn í dag sem sagðist hafa farið í messu á Reykjavíkursvæðinu á jóladag og sagði farir sínar ekki sléttar. Hann sagði að fólk hefði talað saman allan tímann meðan á messugjörð stóð, sama hvort var undir sálmum, prédikun eða öðrum messuliðum. Þetta líkaði mér illa að heyra. Mínir sauðir hvorki hósta né stynja, enda vel aldir upp. Með einni undantekningu þó; Tóti varð að bera tveggja ára dóttur okkar gargandi út úr messu á aðfangadagskvöld, fimm ára bróðir hennar fyrirvarð sig fyrir uppátækið og felldi tár af því tilefni. Þetta atvik varð til að skipta kirkjugestum í tvær fylkingar; þá sem studdu aðgerðina að barnið var fjarlægt og hina sem fannst allt í lagi þó hún hefði gólað aðeins og vildu jafnvel að hún hefði fengið sínu framgegnt, að fá að fara til móður sinnar.
Að vanda var miðnæturmessan með rólegra yfirbragði en aftansöngurinn. Kirkjusókn er ágæt samkvæmt venju. Að því sögðu ætla ég í bólið. Só long.

Gleðilega jólahátíð

elskurnar mínar.. megi friður jólanna umvefja ykkur á bak og brjóst.

 

Mannfræðirannsókn í saumaklúbbi

Ég er í afar skemmtilegum saumaklúbbi. í gær var jólaklúbbur og við skemmtum okkur konunglega. Að vísu vorum við frekar svekktar við gestgjafann sem sagðist hafa valið fljótlega rétti en við fyrirgáfum henni strax þegar við vorum búnar að smakka góðgerðirnar.
En við fundum út i sameiningu að í hverri fjölskyldu er kona sem bakar ógrynni af lagkökum og deilir út til vina og vandamanna. Athyglisvert?

Íslenskar konur, auðvitað

Þrír menn sátu saman og voru að monta sig af því hvernig þeir höfðu 
látið nýju konurnar sínar fá skyldur og verkefni heima fyrir.

 Sá fyrsti hafði gifst konu frá Colarado og hann hafði sagt henni að 
hún ætti að þvo upp og þrífa húsið. Það tók nokkra daga en á þriðja 
degi kom hann heim í hreint hús og uppvaskið búið og frágengið.

Annar maðurinn hafði gifst konu frá Nebraska. Hann hafði skipað 
konu sinni að sjá um öll þrif, uppvask og eldamennsku. Fyrsta 
daginn hafði ekkert gerst  annan daginn hafði það aðeins skánað og 
þann þriðja var húsið hreint, uppvaskið búið og svaka steik og 
meðlæti í matinn.

Þriðji maðurinn hafði gifst konu frá Íslandi. Hann sagði henni að 
hennar verk væru að halda húsinu hreinu, sjá um uppvaskið, slá 
garðinn, þvo þvott og elda heita máltíð í hverjum matmálstíma. Hann 
sagði að fyrsta daginn hefði hann ekki séð neitt, annan daginn sá 
hann ekki neitt en á þriðja degi minnkaði bólgan aðeins svo hann sá 
aðeins með vinstra auganu, nóg svo hann gat útbúið sér eitthvað að 
borða og sett í uppþvottavélina!

Grunaði ekki Gvend

Stórhættulegur þessi handfrjálsi búnaður.

Handfrjálsir farsímar hættulegir

Enginn almennilegur íþróttamaður?

Ég var svo aldeilis hlessa þegar að íþróttafréttamaður lét hafa eftir sér að það væri óvenju erfitt að velja íþróttamann ársins í ár!?! Hefði haldið að valið væri óvenju auðvelt í ár...

Súkkulaði og rökkur á sunnudegi

Þetta er hefur verið mjög dimmur dagur, engu líkara en gleymst hafi að kveikja á efri hæðinni. En ljómandi dagur samt, barn var borið til skírnar fyrir hádegi, farið upp í Hóla að sækja jólatréð eftir hádegi. Ég hitaði súkkulaði þegar fjölskyldan kom hrakin og slæpt heim úr skóginum en eftir nokkra bolla af heitu súkkulaði þá get ég nánast allt. Hrærði í tvöfalda uppskrift af sörum, bakaði dansk rúgbrauð og bauð upp á hangikét með uppstúf í kvöldmat. Það var nokkurskonar utandagskrár hangikjöt, en H&H komu færandi hendi með soðið hangikjét, uppstúf og eplasalat. Börnin áttu varla orð til að lýsa hrifningu sinni á matnum og reyndu ásamt foreldrunum að fá Maríe til að smakka. Tókst reyndar ekki, enda Maríe grænmetisæta og hélt sig við stúfinn og kartöflurnar.
Eina sem ég gerði ekki í dag sem ég vissulega hafði þó ætlað mér voru þrjár jólaprédikanir. Ætli endi ekki með að ég tali það sem andinn blæs mér í brjóst? Grín. Allt í vinnslu og allt undir kontról. Nema jólakortin. Mér virðist fólk vera að detta út af jólakortalistanum, algerlega að ósekju og án þess að hafa til þess unnið. Nokkuð ljóst að ég verð að sjóða súkkulaði áður en ég legg í jólakortaskrif.
Fæ son minn í heimsókn í kirkjuna í fyrramálið ásamt skólahópnum úr Árvist. Hann er búin að óska eftir að fá að vera hjá mér, þar sem að hann sé sonur minn. Það er ekki nema sjálfsagt, aldrei að vita hve lengi blessuð börnin vilja kannast við foreldra sína.

Flottir krakkar- og kennarar

Nemendur Grunnskóla Skagafjarðar voru hæstir í öllum námsgreinum hér á landi sem Pisa könnunin tók til. 15 ára grunnskólanemendur í 57 löndum OECD tóku samræmd próf í náttúrufræði, stærðfræði og lestrarskilningi. (Heimild Skagafjörður.com)

Þetta er aldeilis ánægjulegt að lesa og gleður mitt gamla hjarta. Mér varð hugsað til allra vina minna í kennarastétt, mikið er ég stolt af því góða fólki. Þau geta borið höfuð hátt og farið brosandi í jólafrí.

Í lægð í lægðinni

Ég held að ég sé í lægð. Enda er lægð. Ekki margt um það að segja.